《12夜》的愛情輪迴
-
喜歡係一種感覺，
但愛係需要經營。
—
一對情侶經歷咗十二夜，由相遇到相知相愛相厭相分，由一個十二夜投入另一個十二夜，再由DAY1重新開始。你鍾意一個人嘅時候，會覺得世界上所有嘢都係美好嘅，喺DAY3飾演Alan嘅陳奕迅凌晨壞車，但佢心入面就只係想見飾演Jeannie嘅張栢芝，衝動熱情就係一切，就連屙尿都諗住自己嘅情人，做嘢開會無心裝載。
—
但當你唔再鍾意一個人，或者無feel嘅時候，Jeannie好心幫男朋友拎Notebook，Alan會覺得佢多管閒事，覺得佢侵犯咗自己嘅私隱;以前一晚可以做足三次，但Alan喺第七日同Jeannie講，「做三次會死架」。
—
係咪所有關係都注定會喺十二夜入面開始然後再終結？由一開始鍾意你，覺得天跌落嚟都無所謂，開始慢慢嫌棄對方，睇清楚對方真實嘅一面，然後想有番自己嘅私人空間，以想「做自己」為名，行「不再愛」之實。
—
溝通一定要對話，
但有對話唔代表有溝通。
—
戲入面有一幕，講少爺占同佢嫲嫲講電話，前者想透過電話對話，拎一個好簡單嘅密碼，點知都搞咗一大輪先至成功。點解?原因係因為兩個人都掛住講，而無真正聆聽對方，只係表達自己想表達嘅嘢，忽略咗對方嘅諗法，咁樣唔係叫溝通。
—
呢樣嘢可以投射落之後男女主角，Alan同Jeannie兩個人鬧交嘅情節入面。Alan cancel咗公司出trip，但佢無第一時間通知女朋友，但Jeannie亦無解釋自己有幾咁辛苦先拎到男朋友部電腦。兩個人唔係唔欣賞對方嘅努力，而係佢哋根本唔知道對方嘅付出。一嘈起上嚟，就敗於自尊，敗於唔可以衰比對方睇，死雞撐飯蓋，令關係進一步惡化。
—
Alan同Jeannie講，「緊一個人唔係咁架！」咁情人們又應該點做?其實兩個人都只係用緊自己嘅方式去愛，以為已經做到咁咁咁咁咁喇，咁仲唔係愛？而忽略咗，原來咁咁咁咁咁，喺對方眼中的確唔係愛。以自己嘅方式愛人，以自己嘅角度去睇個世界，其實去到尾只係適合自己同自己拍拖。
—
經營愛需要無限嘅溝通，初初喜歡一個人，你會覺得同佢天造地設，乜都夾，打風都打唔甩。但時間一旦耐咗，兩個人一定會有唔配合嘅地方，就算今日無，聽日後日大後日都一定會有。所以重點並唔係問題存唔存在，而係你會選擇點樣去解決將會問題。
—
放假應該用嚟瞓覺定去旅行？呢個係個人自由嘅選擇，無啱定錯，但點解想瞓覺嘅會唔介意去旅行？係因為Alan對Jeannie嘅愛，填補咗彼此之間嘅分歧。換轉角度，有時候Jeannie都可以陪Alan瞓吓覺，呢個就係愛美妙嘅平衡。
—
《12夜》入面，出現咗幾幕便利店嘅場口，有人叮嘢，有人食杯麵，愛情應唔應該速食？應唔應該單憑感覺？合則來，不合則去，不斷尋尋覓覓於所謂「真愛」？90分鐘之內，Jeannie已經經歷咗三十六夜，經歷咗三段關係，不斷原地踏步，睇嚟就係導演所比嘅答案。
—
「愛」同「做自己」，其實無必然嘅衝突，只不過高層次嘅愛，可以令你進步，可以令你成為更好嘅自己。
Search